新生活@Trading floor

幾經辛苦, 古他終於係過農曆新年前搵番份工. 諗起果排無所事事, 差d出事, 未搵工先辭工, 前前後後成一季冇收入, 古他以後都真係唔敢咁串咁扮瀟灑喇......

古他成日當自己係貓, 黎到新環境, 點都要步步為營, 以和為貴, 低調保留自己既存在感, 起碼過左頭三(個月)先啦. 不過古他真係冇乜大志, 除左請自己個 line manager 之外, 根本唔多同 direct report 既老闆們打交道, 淨係寫呢幾句 blog 都係等d 大班星期五早走先把握時機.

古他轉左去 trading floor, 俾我既最大感受係: 好多人, 真係好L多人. d trader, sales, it support, team head, department head 成日係度周圍"拱", 好鬼嘈, 加上古他係"祖利亞安娜烈士" (junior analyst), 個位開揚到任何兄弟姐妹老細小強都可以隨便踐踏. 簡單黎講, 古他個位既location, 係有如海底隧道銅鑼灣出入口, 好多人出出入入, 最好玩 snap shot 既伏擊位!!

四月派左bonus, 當然冇古他份, 都有d front office同事已經起身走埋人, 當然有出有入, 唔通好似得曼聯入7粒咁反常咩. 係呀, 市道係好左好多, 不過d 機會係俾晒呢d走左既精英分子, 人工職位跳跳跳, 有排都未到古他喎.

唔好下下negative, 家陣最令古他欣慰既係唔洗出街見客, 唔駛跑數, 絕對係穩定既工種! (雖然身處唔穩定既行業) 反正古他未有料到賺大錢, 老土d講句: 咪學下野先囉......